Education

    കൊൽക്കത്തയിലെ ഇന്ത്യൻ അസോസിയേഷൻ ഫോർ ദ് കൾട്ടിവേഷൻ ഓഫ് സയൻസിൽ (ഐഎസിഎസ്) വിവിധ പ്രോഗ്രാമുകളിലേക്ക് അപേക്ഷ ക്ഷണിച്ചു. കേന്ദ്ര ശാസ്ത്ര സാങ്കേതിക വകുപ്പിനു കീഴിലുള്ള സ്വയംഭരണ സ്ഥാപനമായ ഇവിടെ ഇന്റഗ്രേറ്റഡ് ബാച്‌ലേഴ്സ് – മാസ്റ്റേഴ്സ്, ഇന്റഗ്രേറ്റഡ് മാസ്റ്റേഴ്സ് – പിഎച്ച്ഡി, പിഎച്ച്ഡി എന്നീ പ്രോഗ്രാമുകളിലേക്ക് https://iacs.res.in എന്ന വെബ്സൈറ്റ് വഴി ഏപ്രിൽ 30 വരെ അപേക്ഷിക്കാം. 1200 രൂപയാണ് അപേക്ഷാഫീസ്. പട്ടികജാതി, വർഗ, ഭിന്നശേഷി വിഭാഗത്തിന് 600 രൂപ. 1876ൽ ആരംഭിച്ച ഐഎസിഎസ്, ശാസ്ത്ര ഗവേഷണ രംഗത്ത് രാജ്യത്തെ ഏറ്റവും പഴക്കം ചെന്ന സ്ഥാപനങ്ങളിലൊന്നാണ്. നൊബേൽ സമ്മാനം നേടിയ സി.വി.രാമൻ, രാമൻ പ്രഭാവവുമായി ബന്ധപ്പെട്ട ഗവേഷണങ്ങൾ നടത്തിയത് ഇവിടെയാണ്. ഇന്റഗ്രേറ്റഡ് ബാച്‌ലേഴ്സ് മാസ്റ്റേഴ്സ് പ്രോഗ്രാം (5 വർഷം) 2024, 25, 26 വർഷങ്ങളിൽ സയൻസ് സ്ട്രീമിൽ 12-ാം ക്ലാസ് വിജയിച്ചവർക്കും ഇത്തവണ എഴുതുന്നവർക്കും അപേക്ഷിക്കാം. 60% മാർക്ക് വേണം. ഇത്തവണത്തെ ഐസർ ആപ്റ്റിറ്റ്യൂഡ് ടെസ്റ്റ് (ഐഎടി) സ്കോറിന്റെ അടിസ്ഥാനത്തിലാകും പ്രവേശനം. ഐഎടിക്ക് അപേക്ഷിച്ച ശേഷം ഐഎസിഎസ് പോർട്ടലിലും അപേക്ഷിക്കണം. അവിടെ ഐഎടി റജിസ്ട്രേഷൻ നമ്പർ നൽകണം.സർട്ടിഫിക്കറ്റ്, ഡിപ്ലോമ, ബിഎസ്, ബിഎസ് (റിസർച്), എംഎസ് എന്നിങ്ങനെയുള്ള യോഗ്യതകളുമായി പ്രോഗ്രാമിന്റെ ഓരോ വർഷവും പുറത്തിറങ്ങാനുള്ള അവസരങ്ങളുമുണ്ട്. നാലാം വർഷം മുതൽ സ്റ്റൈപൻഡ് ലഭിക്കാനുള്ള യോഗ്യതയുമുണ്ട്. മാസ്റ്റേഴ്സ്/ ഇന്റഗ്രേറ്റഡ് മാസ്റ്റേഴ്സ് – പിഎച്ച്ഡി പ്രോഗ്രാം അപ്ലൈഡ് ആൻഡ് ഇന്റർഡിസിപ്ലിനറി സയൻസ്, ബയോളജിക്കൽ, കെമിക്കൽ, ഫിസിക്കൽ, മെറ്റീരിയൽസ്, മാത്തമാറ്റിക്കൽ ആൻഡ് കംപ്യൂട്ടേഷനൽ സയൻസസ് എന്നീ സ്കൂളുകളിലാണ് ഈ പ്രോഗ്രാം നടത്തുന്നത്. 60 %ശതമാനം മാർക്കോടെ അതത് വിഷയങ്ങളിൽ ബിരുദം പൂർത്തിയാക്കിയവർക്കും ഇത്തവണ പൂർത്തിയാക്കുന്നവർക്കും അപേക്ഷിക്കാം. ഫിസിക്സ്, കെമിസ്ട്രി, ബയോളജി, മാത്‌സ് വിഷയങ്ങളിലെ പ്രവേശനത്തിന് ‘ഐഐടി ജാം’ സ്കോറാണ് പരിഗണിക്കുന്നത്. കംപ്യൂട്ടർ സയൻസ് പ്രവേശനത്തിന് ഗേറ്റ് സ്കോർ പരിഗണിക്കും. പ്രതിമാസം 12000 രൂപ സ്റ്റൈപൻഡ് ലഭിക്കും. പിഎച്ച്ഡി പ്രോഗ്രാം ഐഎസിഎസിലെ വിവിധ വകുപ്പുകളിൽ പിഎച്ച്ഡി പ്രവേശനത്തിനായും ഇപ്പോൾ അപേക്ഷിക്കാം. വിശദവിവരങ്ങൾ വെബ്സൈറ്റിൽ.