അറബിക്കടലില് അപകടത്തില്പെട്ട എംഎസ്സി എല്സ 3 കപ്പല് പൂര്ണമായും മുങ്ങി. കൂടുതല് കണ്ടെയ്നറുകള് കടലിലേക്ക് മറിഞ്ഞതിന് പിന്നാലെയാണ് കപ്പല് പുര്ണമായും കടലില് താഴ്ന്നത്. കൊച്ചിയിലേക്കു വന്ന എംഎസ്സി എല്സ 3 എന്ന ലൈബീരിയന് കപ്പലാണു തീരത്തു നിന്നു 38 നോട്ടിക്കല് മൈല് (70.3 കിലോമീറ്റര്) തെക്കു പടിഞ്ഞാറായി ചെരിഞ്ഞത്. വിഴിഞ്ഞം തുറമുഖത്തുനിന്നു പുറപ്പെട്ട ചരക്കുകപ്പല് കൊച്ചി പുറങ്കടലില് അപകടത്തില്പ്പെട്ടാണ് കണ്ടെയ്നറുകള് കടലില് വീണത്. കപ്പലിനെ നിവര്ത്താനുള്ള ശ്രമങ്ങള് പരാജയപ്പെട്ടതോടെയാണ് കപ്പല് പൂര്ണമായും കടലില് താഴ്ന്നത്.
കപ്പലില് ബാക്കിയുണ്ടായിരുന്ന ക്യാപ്റ്റന് ഉള്പ്പെടെയുള്ള മൂന്ന് പേരെ ജീവനക്കാരെ നേരത്തെ ഐഎന്എസ് സുജാത രക്ഷപ്പെടുത്തിയിരുന്നു. ഇന്നലെ തന്നെ 21 പേരെ രക്ഷപ്പെടുത്തിയിരുന്നു.
കപ്പല് കരയിലേക്ക് അടുപ്പിക്കാന് കഴിയുമോ എന്നുള്പ്പെടെയുള്ള സാഹതചര്യങ്ങള് നാവിക സേനയും പരിശോധിച്ചിരുന്നു. എന്നാല് പ്രതികൂലമായ കാലാവസ്ഥയില് കടല് പ്രക്ഷുബ്ദമായത് രക്ഷാപ്രവര്ത്തനങ്ങള്ക്ക് തിരിച്ചടിയായി. കപ്പലിനെ നിവര്ത്താനുള്ള ശ്രമങ്ങള് ഫലം കാണുന്നില്ലെന്നാണ് നാവിക സേനയില് നിന്ന് ലഭിക്കുന്ന വിവരം. 26 ഡിഗ്രി ചെരിഞ്ഞ കപ്പലിന്റെ മുകളിലോട്ടുള്ള ഭാഗത്ത് ഭാരം നിറച്ച് കപ്പലിനെ ബാലന്സ് ചെയ്യിച്ച് നിര്ത്താനുള്ള ശ്രമങ്ങളാണ് നടക്കുന്നത്.
കടലില് വീണ കണ്ടെയ്നറുകള് എറണാകുളം, അലപ്പുഴ തീരത്ത് എത്തിയേക്കുമെന്നാണ് വിലയിരുത്തല്. ഇന്ന് ഉച്ചയോടെ കണ്ടെയ്നറുകള് തീരത്ത് അടുത്തേക്കും. കണ്ടെയ്നര് തീരത്ത് അടിഞ്ഞാലും ജനങ്ങള് ഉള്പ്പെടെ അടുത്ത് ചെല്ലരുതെന്ന് നേരത്തെ തന്നെ അധികൃതര് അറിയിച്ചിരുന്നു. എന്നാല് കണ്ടെയ്നറില് എന്താണെന്ന് ഇതുവരെ അധികൃതര് പുറത്തുവിട്ടിട്ടില്ല. സള്ഫര് കലര്ന്ന ഇന്ധനമാണെന്ന് സൂചനയുണ്ട്.
%20164%20X%2082.gif)
