ഒരു വിജയകരമായ ഡയറി ഫാമിന്റെ ശക്തമായ അടിത്തറ ആരോഗ്യമുള്ള കിടാവുകളാണ്. ഇന്ന് മികച്ച രീതിയിൽ പാൽ ഉത്പാദിപ്പിക്കുന്ന ഓരോ പശുവും ഒരിക്കൽ ശ്രദ്ധാപൂർവ്വം പരിപാലിക്കപ്പെട്ട ഒരു കിടാവായിരുന്നു. അതിനാൽ കിടാവുകളുടെ പ്രാരംഭ ജീവിതഘട്ടത്തിലെ പോഷണവും പരിപാലനവും ഭാവിയിൽ അവയുടെ വളർച്ച, ആരോഗ്യസ്ഥിതി, ഉൽപാദനക്ഷമത എന്നിവയെ നിർണയിക്കുന്ന നിർണായക ഘടകങ്ങളാണ്. കിടാവുകൾക്ക് ശരിയായ തീറ്റയും പരിപാലനവും ലഭിക്കുമ്പോൾ അവ ആരോഗ്യമുള്ള ശരീരഘടനയോടെ വളരുകയും ഭാവിയിൽ ഉയർന്ന പാലുത്പാദന ശേഷിയുള്ള പശുക്കളായി മാറുകയും ചെയ്യുന്നു. ഇതിലൂടെ ഫാമിന്റെ ഉൽപാദനക്ഷമതയും കർഷകരുടെ വരുമാനവും വർധിക്കുന്നു.
പരമ്പരാഗതമായി കിടാവുകൾക്ക് തള്ളപ്പശുവിന്റെ പാൽ അല്ലെങ്കിൽ ഫാമിൽ ലഭ്യമായ കറന്ന പാൽ നൽകുന്ന രീതിയാണ് കൂടുതലായും പിന്തുടരുന്നത്. എന്നാൽ ഇന്നത്തെ സാഹചര്യത്തിൽ പാലിന് വിപണിയിൽ നല്ല വില ലഭിക്കുന്നതിനാൽ കിടാവുകൾക്ക് വലിയ അളവിൽ കറന്ന പാൽ നൽകുന്നത് പലപ്പോഴും സാമ്പത്തികമായി പ്രായോഗികമല്ല. ഈ സാഹചര്യത്തിലാണ് കിടാവുകൾക്ക് പാലിന് പകരം നൽകാവുന്ന ശാസ്ത്രീയമായി തയ്യാറാക്കിയ തീറ്റയായ കാഫ് മിൽക്ക് റിപ്ലേസർ പ്രധാന്യമാർജിക്കുന്നത്. കാഫ് മിൽക്ക് റിപ്ലേസർ ഉപയോഗിക്കുന്നത് കിടാവുകളുടെ വളർച്ചയ്ക്കും ആരോഗ്യത്തിനും സഹായകരമാകുന്നതിനോടൊപ്പം കർഷകർക്ക് കൂടുതൽ പാൽ വിപണിയിൽ വിൽക്കാനും അവസരം നൽകുന്നു.
%20164%20X%2082.gif)
