നാളികേര കർഷകരെ സമ്മർദത്തിലാക്കി കൊപ്ര വില വീണ്ടും കുറഞ്ഞു. മില്ലുകാർ സംഭരണം കുറച്ചതോടെ കൊച്ചിയിൽ കൊപ്ര വില 200 രൂപ ഇടിഞ്ഞ് 17,000 രൂപയായി. വെളിച്ചെണ്ണ വിലയും താഴ്ന്നു. എന്നാൽ തമിഴ്നാട്ടിൽ ഇന്ന് നാളികേരോൽപന്നങ്ങളുടെ വിലയിൽ മാറ്റമില്ല. വില തകർച്ചയിൽ പരിഭ്രാന്തരായ കർഷകർ വിളവെടുപ്പിന് തിടുക്കം കാണിക്കുന്നതിനാൽ ഗ്രാമീണ മേഖലകളിലെ ചെറുകിട വിപണികളിൽ തേങ്ങ വരവ് ഉയരാൻ സാധ്യതയുണ്ട്.
രാജ്യാന്തര റബർ വില ഒരു വർഷത്തിനിടയിലെ ഏറ്റവും ഉയർന്ന നിലവാരത്തിൽ. ചൈനീസ് വ്യവസായികൾ ചരക്ക് സംഭരണത്തിന് ഉത്സാഹിച്ചത് മുന്നേറ്റത്തിന് വഴിയൊരുക്കി. ബാങ്കോക്കിൽ റബർ കിലോ 227 രൂപയിൽനിന്നും 231 രൂപയായി. ജപ്പാൻ അവധി വ്യാപാരത്തിൽ കിലോ 371 യെന്നിലേയ്ക്ക് കയറിയത് സിംഗപ്പൂർ, ചൈനീസ് എക്സ്ചേഞ്ചുകളിലേക്ക് നിക്ഷേപകരെ ആകർഷിച്ചു. സംസ്ഥാനത്ത് നാലാം ഗ്രേഡ് റബർ കിലോ 222 രൂപയായി ഉയർന്നു.
%20164%20X%2082.gif)
