ഗായിക മഞ്ജരി ആലപിച്ച ശിവ ഭക്തി ഗാനം സമൂഹമാധ്യമങ്ങളിൽ തരംഗമാകുന്നു. ‘ഭം ഭയഭരിതം’ എന്ന ഗാനമാണ് ട്രെൻഡിങ് ആകുന്നത്. ഗിരീഷ് പുത്തഞ്ചേരിയുടെ മകൻ ദിൻനാഥ് പുത്തഞ്ചേരിയാണ് ഗാനത്തിന് വരികളൊരുക്കിയത്. ശിവതാണ്ഡവത്തിന്റെ ഊർജ്ജം തുടിക്കുന്ന വരികൾ ഇതിനോടകം ആസ്വാദക മനസ്സുകൾ കീഴടക്കിയിട്ടുണ്ട്.
കൈലാസനാഥന്റെ വിശ്വരൂപം ഗ്രാഫിക്സിന്റെ അകമ്പടിയോടെയാണ് വിഡിയോ ഗാനത്തിൽ ഒരുക്കിയിരിക്കുന്നത്. ദൃശ്യചാരുതയും മഞ്ജരിയുടെ സ്വരവും ചേരുന്നതോടെ ഈ ഭജൻ ഗാനം മനസ്സിൽ നിന്നും മായാത്ത സംഗീതാനുഭവമാകുന്നുവെന്ന് ആസ്വാദകർ കുറിക്കുന്നു.
വരികളെഴുതിയ ദിൻനാഥ് പുത്തഞ്ചേരിയെയും ആസ്വാദകർ അഭിനന്ദിക്കുന്നുണ്ട്. ശിവഭക്തിയുടെ തീക്ഷ്ണത ഒട്ടും ചോരാതെ ദിൻനാഥ് ഒരുക്കിയ വരികൾക്ക് ഗിരീഷ് പുത്തഞ്ചേരിയുടെ കാവ്യപൈതൃകത്തിന്റെ സ്പർശമുണ്ടെന്ന് ആസ്വാദകർ കുറിക്കുന്നു.. നിരവധിപ്പേരാണ് പാട്ടിന് അഭിനന്ദനങ്ങൾ നേർന്നുകൊണ്ട് കമന്റ് ചെയ്യുന്നത്. സമൂഹമാധ്യമങ്ങളിൽ റീലുകളായും ‘ഭം ഭയഭരിതം’ തരംഗമാവുകയാണ്. സാജൻ മാധവാണ് ഗാനത്തിന് സംഗീതമൊരുക്കിയത്.
‘അച്ചുവിന്റെ അമ്മ’ എന്ന ചിത്രത്തിലെ ‘താമരക്കുരുവിക്ക് തട്ടമിട്’ എന്ന ഗാനത്തിലൂടെ മലയാളികളുടെ മനസ്സിലിടം നേടിയ ഗായികയാണ് മഞ്ജരി. ചലചിത്ര പിന്നണി രംഗത്തും ആൽബങ്ങളിലും സജീവമായ താരം നിരവധി ജനപ്രിയ ഗാനങ്ങൾ ആസ്വാദകർക്ക് സമ്മാനിച്ചിട്ടുണ്ട്. ഗാനരചയിതാവായും സംവിധാന സഹായിയായുമെല്ലാം സിനിമാ രംഗത്ത് സജീവമാണ് ദിൻനാഥ് പുത്തഞ്ചേരി. മമ്മൂട്ടി നായകനായ ‘ഭ്രമയുഗം’ സിനിമയിൽ ദിൻനാഥ് എഴുതിയ ഗാനങ്ങൾ ഏറെ ശ്രദ്ധേയമായിരുന്നു.
%20164%20X%2082.gif)
